مرحلة "ما قبل الانترفيو"، و هي أهم من الانترفيو نفسه
● أول مرحلة في الانترفيو هي مرحلة "ما قبل الانترفيو"، و هي أهم من الانترفيو نفسه.
• تعرف إيه عن الشركة (أو المؤسسة) اللي انت متقدملها ؟ تعرف إيه عن نشاطاتها؟
إيه أهم إنجازاتهم ؟ مين أهم عملائهم ؟ إيه كانت نتايجهم السنة اللي فاتت ؟
- اللي هيشغلك هيشوفك شخص مجتهد لأنك درست الموقف كويس قبل ما تقُدم عليه و ده هيدي انطباع أولي عنك كويس جداً. ده غير ان بعض المدراء شركاتهم هي انجاز حياتهم و بيقدّروا جداً اللي بيقدّروا الانجاز ده و بيحترموه.
- الأماكن اللي هتعرف بيها المعلومات دي هي موقعهم و بياناتهم الرسمية أو تسأل موظف شغال هناك. (بعض الشركات بتدي bonus لموظفين اللي بيجيبوا ناس جديدة للشركة)
و الموظفين دول هيكونوا سعيدين جداً انهم يدوك معلومات تفصيلية عن الانترفيو علشان تنجح فيه لأنهم مستفيدين من وراك.
• جهز الاسئلة اللي تتوقع انك تتسألها و أجوبتك ليها.
- فيه ناس بتتوتر لما بتدخل الانترفيو و بتتلخبط في اجابة اسئلة هما عارفين اجاباتها كويس.
حاول تحضر الاسئلة و اجاباتك عليها و تكتبها في ورقها واقراها كتير بحيث تتعود عليها و متخافش لما تيجي تجاوبها.
- لو مش عارف إيه الاسئلة أو طريقة الإجابة عليها استعين بصديق شغال في الـ HR أو شخص بيعمل انترفيو للناس في الشغل أو سلسلة تعليمية (زي سلستنا دي) لمعرفة الاسئلة اللي ممكن تتسألها و الطريقة المناسبة لإجابتها.
- اعمل انترفيو تجريبي مع صديق و خليه يسألك و جاوب عليه و اعمل سيناريو كامل في عقلك للي ممكن يحصل في الانترفيو و تستعدله كويس.
------
● مرحلة ما قبل الانترفيو "2".
دي كانت المرحلة الأولى في كيفية دخول الانترفيو. شاركونا بأغرب المواقف اللي حصلتلكم في الانترفيو، و احكولنا إيه أصعب الاسئلة اللي اتعرضتولها و الاسئلة اللي عاوزين تعرفوا طريقة إلإجابة عليها و احنا هنكون سعداء لمساعدتكم و الإجابة عليها.
إرسال تعليق