اسئلة المُخيلة و الذكاء "2"

● اسئلة المُخيلة و الذكاء "2"

• إيه لونك المفضل ؟ 
أوصفه لشخص أعمى.
من أشهر الاسئلة اللي ممكن تتعرضلها في الانترفيو وإجابته بسيطة جداً:
- الأحمر. هوصفه بإني أقوله ان الأحمر هو نفس إحساس لمس النار أو حرارة الشمس.
- الأزرق. هوصفه بإني أقوله ان الأزرق هو نفس البرودة و ريحة ميّة البحر.

*حاول لما تتسأل عن لونك المفضل متتفلسفش علشان هيكون صعب توصف لون زي البنفسجي مثلاً.
----

• اقنعني ان ميكي ماوس قتل السادات.
كان من أغرب الاسئلة اللي اتسئلتها في حياتي و حبيت اشاركه علشان متستغربش السيناريوهات الغريبة اللي ممكن تتحط فيها في الانترفيو

- إجابتي كانت: السادات كان بيحارب إسرائيل، و اللي كانت بتدعمها أمريكا، ولو السادات فاز في الحرب كان هيحارب أمريكا، و ميكي ماوس شغله في أمريكا فقتل السادات علشان الحرب كانت هتوقف شغله و تخرب بيته و تخلي ميمي تطلقه.
----

• فيه اعصار حصل و انت راكب عربيتك و مفيهاش غير مكان إضافي واحد بس و مريت في طريقك على ست عجوزة، و صديق عمرك، و حب حياتك .. هتختار مين منهم يركب معاك ؟

-المفروض ان اختيار الست العجوزة يعني انك شخص عطوف، و صديق عمرك يعني ان عندك ولاء، و اختيار حب حياتك يعني انك مخلص للحاجات اللي بتحبها. لكن واحدة من أكتر الاجابات العبقرية للسؤال ده كانت:
هنزل من العربية، ادي المفاتيح لصديق عمري و اخليه ينقذ الست العجوزة و افضل مع حب حياتي و نواجه العاصفة سوا.

-حاول دايماً تفكر خارج الصندوق في الاسئلة دي، و مهما كانت اجاباتك غريبة فهي أحسن بكتير من انك تقول مش عارف