يوم الانترفيو "2"

● يوم الانترفيو "2".

• خلال الانترفيو

دلوقتي انت مستعد للانترفيو و جيت في معادك و نادوا اسمك و دخلت.

- متنساش تقفل موبايلك ومتراهنش على "Silent" علشان لو رن جوا هتكون كارثة.
- ادخل وانت مبتسم. اوعى تدي أي تعليق سلبي عن درجة الحرارة و زحمة الطُرق والمظاهرات. لازم تكون بتنقط إيجابية لأن الموظفين السلبيين شئ مكروه جداً.

- هيقولك "the interview will be conducted in English" وده معناه ان الانترفيو كله بالانجليزي، لو مقالش يبقى ممكن تجاوب اسئلة عرفنا بنفسك و ليه ممكن نشغلك بالانجليزي و تكمل الباقي بالعربي لو الـ HR معندوش مشكلة.

- لازم يعرّفك باسمه و منصبه في المؤسسة قبل بداية الانترفيو. خد بالك علشان ساعات فيه HRs مش بيعرفوا نفسهم و بيجوا في نهاية الانترفيو و يسألوك الانترفيو ده ناقص حاجة ؟ فدي حاجة من اساسيات أي انترفيو ميكملش بدونها.

- الـ Body Language جزء من الانترفيو. ساعات بيحطك قدام سؤال صعب جداً علشان يشوف رد فعلك تحت الضغط. حاول تتماسك و متخافش.

- لو غلطت في سؤال متتوترش، و في نهاية الانترفيو اطلب منه يجاوبك على الحاجات اللي معرفتش ترد عليها، ده هيحسسه أكتر باهتمامك و جديّتك.

- أحيانا ممكن الـHR يطلب منك حاجات تفاعلية زي انك تبيع قلم للناس في الشارع بضعف تمنه أو انك حتى ترقص و تغني بصوت عالي او تجري. هو مش بيلعب بيك، هو بيحاول يشوف درجة مرونتك في تقبل الأوامر الصعبة.